Dear Father:
Have you heard the news? They say the orlor day some chiefs from the lower side of the Traditional Council went to ley place ridding in kehkeh leg. They say da protest they wor doing for ley village people to buy them car.
You say wahtin! You mean da how ley people dem so heartless?
Father, heartless da understatement. Who say ley chief dem geh time for our village people. Ley only thin they can worry about is themselves. Bor they jus starting. If they like they mon even ride wheelbarrow to ley Traditional Council, then we will know they serious- nonsense!
Hmmm, ley people dem.
Father, ley people jus too greedy, even ley new one them da jus entered ley Traditional Council are even worse.
They na even care for our people in ley village here. Ley way our people suffering in ley village here da na fun. People walk up and down everyday, and you can see ley suffering on their faces.
Instead of them saying we need to fight hard to put buses on the road for our people, they don’t care. Ley only thin they care about is da every 3 year they mon geh new car.
Bor, they jus starting Father. Ehn somer them na go credit their whole 6-year salary from bank, leh them be there. Ley serving, they say they go do, aay na turn to them looking for their own riches. They will balance.
They forgetting to know da their behaviour dem making nobody wan come in or village to do bisnay. People scare da by ley time they show face, they will wan gash dem, so everybody scare of our village na.
Fitting road sef, we na geh in our village. See how our people dem can suffer everyday. Ley lay kehkeh leg and penpen, ley wor depending on, they say they mon na come in town.
For you to go fight for ley people to geh buses, you there you say you protesting. Go, if you leh come in wheelbarrow or better you stay home.
Leh ley Papay there doing ley same thin, ley Footballer did, putting so, so of him village people in power. Him go take ley people dem from ley Telephone Place there and put so, so of him village people there, yor na see da one to talk some, bor da car bisnay your say, yor go protest.
My son, ley one you too vex ooh.
Yes, mehn Father, ley people them can make people vex too much mehn. All ley thin them they doing to our people in ley village, pushing them here and there, people suffering all over ley place, instead of them talking some, da car protest they on.
Looka, rice bisnay coming be hard in our village ley few days, they na talking some ooh. People living on ley outskirt of our village, wen ley come to work sef, they can be worried how they will go home or come back ley next day. They na even care for da one sef.
Ley only thin they concern about da car-next week yor mon come inside wheelbarrow dem we will know da yor very serious.
